بسم الله الرحمن الرحيم
نبض قلبي
الجزء الاول
اه يا نبض قلبي تهت معي في هذا العالم فلم اعد اسمع لك صوت .. صوتك ضاع تلاشى .. حاولت ان اناديك استوقفك ..لم اعثر لك على مكان .. لم اعد اعرف اين انت .. اه يانبض قلبي .. لم اجد لك برا للامان ,, لم اجد لك مرسى حتى تستريح فيه .. او هدوءا يخفف من سرعة نبضك .. سرعة نبضك التي تتزابد يوما بعد يوم .. خوفا والما وترقبا لما هو ات
عشت في بيت كبير مع عائله كبيره .. ابوي راشد الي حبيته اغليته على نفسي وحياتي .. كنت اعيش لاجله .. اضحك لضحكه احزن لحزنه .. كانت لمحة الحزن كبيره في عينه عمري ما شفتها خفت او تلاشت كان دايم يحسسني بالمسؤوليه الكبيره الي عليه .. امي مريم .. عمري ما عرفتها كانت غامضه على طول من توفت اختي سماح وهي بدنيا ثانيه بعالم ثاني.. عمري ماشفتها جلست معانا عمري ماسمعتها تسال عننا وعن حالنا .. حالنا الي ما اعرف لسا يهمها او لا .. ارجع واقول هذي امي تعمل الي تبيه حنا عيالها وعلينا اننا نستحمل تصرفتنا .. بس هذا ما يمنع من اني اقول انها بعيده .. ابعد مما يتخيله العقل .. سامي اخوي الكبير 32 سنه هو اكبرنا .. وعيونه علينا دايم احبه حب ما حد يعرف قدره انا وسامي عمرنا ما افترقنا دايم مع بعض .. كلمتنا عمرها ما اختلفت حتى لو تعارضنا لازم واحد فينا يمشي كلمة الثاني .. الخلافات بيننا نادر ماكانت تصير لاني احبه وما احب اني اكسر كلمته قدام خوانه ..سامي له هيبه مميزه قوته مميزه عقله حكيم كثير.. طول عمره رجال بمعنى الكلمه حامل المسؤوليه مع ابوي عمره ما اشتكى ولا تذمر .. حتى امي الي كانت ترمي الكلمات الجارحه عليه .. عمره ما علق عليها ولا تضايق منها .. انا عارفه انه كاتم كل شي بقلبه بس في حياته ماتكلم .. عقب سامي نجي انا وسماح توائم سماح توفت وهي عندها 9سنين .. حادث وفاتها اثر على الجميع لحد الان وانا عمري 28 سنه موضوع موتها مثار للناقش الدايم بيني وبين سامي وخالد وفهد وسالم .. بعدنا على طول يجي خالد 27 سنه .. خالد ذكي جدا مشا الله عليه دماغ تجاري ورث هالشي من ابوي احبه واحب رجولته يحسسني انه الظهر الي استند عليه واشتكي له .. صحيح اني مبعدته عن موضوع الشكوى والجأ لسامي كثير بس غلاة خالد عندي كبيره .. بعديه يجي فهد 26 سنه.. فهودي هذا قطعه من روحي اموت عليه .. حبه بقلبي غير.. يمكن اني ادللـه عن الباقي لانه يعرف كيف يدخل علي .. انا عارفه هالشي زين عارفه لما يتدلع ايش يبي عارفه لما يمدح ويتغزل ايش يبي حافظني وعارف كيف ياخذ الي يبيه مني بسهوله بعديه يجي سالم 24 سنه .. اسمه سالم وهو مسالم بعادته هادىء بطبعه طويل عريض يحمل من الوسامه القدر الي يخليه يثق بعمره كثير سالم احسه اكثر اخواني قوه جسديه محد يقدر عليه منهم .. ولا حد يفكر انه يمزح معاه بخشونه حتى .. يشتغل مع ابوي بعد .. الميزه الحلوه في سالم انه روحه في اخوانه صحيح انه هادىء وهدوئه يثير اعصابي .. بس اذا صار وقت الجد تلقاه انسان ثاني .... بعديه يجي فيصل 17 سنه .. فيصل هذا قمه في الهدوء يفوق سالم بهدوئه وسكوته .. اطلق عليه المتفرج .. بعكس محمد .. محمد 12 سنة .. محمد هذا ماخذ قلبي وعقلي برجولته وقوته وحركته وشقاوته .. ذكائه حاد عنده سرعة البديهه قوي في قراراته.. صحيح هو الصغير بس احساسي فيه غير محمد ولدي الي ربيته .. صحيح اني فرضت سيطرتي على الكل حاولت اغرس فيهم حب بعضهم البعض والحمدلله .. الله وفقني لهالشي وطبعا هذا بتعليم من ابوي الي كان دايم يحرص انه يردد علي هالكلام .. اخوانك قطعه منك اذا حبيتهم من قلبك حبوكي وعزوكي .. بعزتهم انتي عزيزه وبقوتهم انتي قويه .. بحبك لهم بيتعلمو كيف يحبو بعض .. بخوفك عليهم بيتعلمو كيف يخافو على بعض .. اذا عرفتي كيف تنجحي بهالشي ضمنتي الامان .. خالد
كنت ابغي اصحيها من نومها لكني متردد ... ما احمل اخبار تسر ابدا احس انها بتتعرض لانتكاسه كبيره ... عيني عليك يا سما كيف اصحيك وكيف اخبرك ... اخليكي نايمه احسن بعد مانخلص اكلمك بشويش؟.. حرام علي
ياربي ساعدني ايش اعمل
خالد: سما .. حبيبتي اصحي ياروحي صرنا الظهر
سما: ..................
خالد: قومي ابيك بموضوع اصحي لي شوي
سما: .................
خالد: حبيبتي ... ماعرف اشلون ابي..............
سما: ابوي؟!!!!!!!
~ تلاقت عيني بعينها يالله ماعرفت اتكلم ولا انطق بحرف عيونها ...اه من عيونها ... دائما تقرا يلي ابي اقوله من غير ما انطق.
قامت من فراشها وبأمر منها من غير ما تلتفت لي ~
سما: خالد ابي اشوفه قبل مايندفن انت سامع
خالد: ......................
~ غسلت والبست وقامت تصلي ... لباسها مثل ماهو ماتغير من خمس شهور ... فضلت بدل ماتبكي او تصرخ اكتفت بلبس الاسود ... هدوئها مثل ماهو ماتغير تعبير وجهها مثل ماهو ماتغير ... قوتها عصبيتها حنانها نظراتها وعيونها ... اه من عيونها يا روحي انتي ياسما لو بيدي سعادتك متأخرت
وصلنا للمستشفى.. كانت ساكته طول الطريق ما فتحت فمها باي كلمه وانا ظليت ساكت بعد.. ما لقيت الي يواسيها ويواسيني معاها ... اصرت البارح انها تنام معاه كانت تحس باحساسها الي عمره ما خاب انه اخر يوم له معاها.. معاها وحدها.. طلب منا البارح نطلع برا عرفته في المستشفى .. كان يبغي يتكلم معاها لوحدهم طبعا طلعنا.. تركناهم ظلو كثير.. كثير ..كثير
بعدها نادتنا ندخل ودخلنا, شفناه وهو قاعد كان صاحي مافيه شي.. يضحك ولو ان الكلام كان يتعبه بس ظل يتابعنا بنظراته اكيد كان يبي يشبع منا كلنا وهي بالذات عيونه عليها في كل شي تقوله او تسويه وابتسامته تلاحقها وين ماراحت يسرح في شكلها شوي ويرجع لنا شوي.. وهي عشان تقاوم شعور فراقه تمت تناظره كثير بس انا متاكد انها ماشبعت منه.. ولا راح تشبع.
وصلنا لغرفته.. وقفت شوي .. شافت الكل ناظرت الكل ماتوقعت الي قالته ابد .. وقتها محمد كان يبكي بحرقه بس من غير صوت.. حبس صوته في داخله .. عارف ان الصوت مهما ارتفع ماراح يرجعه لنا... خلاص راح ~
سما: محمد اغسل وجهك وتعال احنا بخير.. ابي اسلم على ابوي وارجع ولا قيكم تضحكون... ظهرنا لحد الان مانكسر.. وابونا بخير.
~ فتحنا عيوننا عليها.. افتحت الباب ووقفت شوي.. ابتسمت وراحت له.. دخلت معاها ووقفتني.. امنعتني بنظرتها ~
سما: خليني معاه شوي.. انا بخير دامه بخير
~ سكرت الباب وجلسنا نناظر بعض.. دامه بخير؟!! .. فهد كان قلق عليها كثير ~
فهد: غلط نتركها معاه
خالد: ايش يبي يصير بياكلها يعني خلها تسلم عليه.. اختك ماهي بضعيفه
محمد: بس تخزن في عقلها وخاطرها مكسور من ماتت امي وهي على هالحال
سالم: كانت سما تقول على قد ما ابوي يعشق امي على قد منا خايفه يلحقها وصدقت خمس شهور ماقدر يستحمل فراقها.. لحقها.. والله ماني مصدق
خالد: استغفر ربك يارجال.. ايش الي تقوله
سالم: عمري مانسيت هذاك اليوم بعد صلات العيد.. صار لها يمكن شهرين وكم يوم من توفت .. وقتها ابتدينا نستوعب فكرت موتها .. الا هو
خالد: ايوا صح .. ماتوقعته ابد .. كان هو الي يقوينا ويصبرنا.. اتضح انه هو من كان يحتاج ان حد يصبره
سالم: ما انسى منظره يوم نداها "مريم يا حبيبة روحي انتي وين..عيدك مبارك.. يا مريم .. وين القهوه يا مريم.. وينك وين صباحك" .. دنيت منه وقلتله يبا .. قالي يابوك امك اكيد فيها شي ماترد.. ياعيال شوفو امكم وين.. قلتله يبا امي عند ربها.. ناظرني ووطى راسه وقالي ايوه نسيت.
~ سكت سالم.. والكل يبكي.. كان منظر ابوي هذاك اليوم يقطع القلب ما استوعبت انه نسى .. هذا يعني ان امي عايشه معاه في خياله وروحه .. صحيح اختفت من قدام عينه . بس هي ساكنه في قلبه , عقله ، كل كيانه
~ صدقت بكلمتك يبا .. الي يسكن القلب ويملكه مايقدر احد يبعده حتى الموت.. رحمت الله عليك يالغالي ويسكنك فسيح جناته مع من اسكنت قلبك.~
محمد: سما طولت.. قعدت ساعتين يكفيها خلاص.. خالد تصرف
~ دخلت عليها.. وشفتها وهي تبتسم له .. ماسكه ايده وتناظره .. قلبي وقف حينها كيف تركتها مع ميت ..حتى لو كان ابوي.. كان المفروض نحاسب عليها على قد ماهي قويه على قد ماهي رقيقه وحنينه حتى وهي تناظره وهي قاعده وشكلها خايف مو منه اكيد .. من باكر ~
انتبهت لي اني واقف على الباب
سما: سلمتو عليه
خالد: أي نعم .. نبي ننتظر س..
سما: لا..خلونا نعجل اكرامه سرعة دفنه.. اذا انتظرناه بيتم ابونا كذا لحد بكره
~ بعد صلات العصر انتهينا من كل شي.. كل شي.. ودعنها وخليناه .. وقلوبنا تتقطع على فراقه .. بدري يابوي الي مثلك ماينشبع منه.. قلت هالجمله وانا واقف على قبره.. مانع دموعي تنزل حزن عليه الي مثله ماينحزن عليه ينحزن على فراقه بس.. دخلنا المجلس واستقبلنا عزاه وكل واحد ساكت ولاهو قادر يتكلم .. يهمس بالاشاره بس.. كلامنا كله بالاشاره بس.. حنا هنا وسما هناك وحدها.. صحيح مع الحريم وبنات العمومه بس بعد لوحدها من غيرنا.. قلبي عليكي ياروحي انتي .. كان ودي احضنها بس اعرفها بتكابر ومابتسمح لاحد يقترب منها على الاقل اليومين هذول.
صلينا العشا وقعدنا والناس بدت تزيد والرجال في كل مكان ومن كل مكان الي نعرفه والي مانعرفه.. منظرهم يوجع القلب .. متلثمين وعينهم تجري بالدموع .. هالمنظر وقفت عنده كثير .. خفت على اخواني منه كثير .. اكيد بيزيد الحزن بقلوبهم على ابوي .. وقف عمي ناصر جنبي وقالي هايبا انت بخير؟.. ما اذكر اني رديت .. مره وحده السكوت حل.. بدا همس بين المعزين ماسمعت شي الصوت بدا يهدى اكثر واكثر من ذا منو جا .. مين ذا الي الناس سكتت بوصوله؟ ~
فيصل: خالد.. سامي وصل
خالد: سامي؟ وينه فيه
فيصل: عند الحريم
~ اه المفروض اني ما اسأل .. كان لازم اعرف انه عند سما .. سالم ينادي علي تعال بسرعه؟؟ خير ايش صار ~
سالم: تخيل
خالد: ايش
سالم: عمي ناصر يسالني متى بتوزعون الورثه؟
خالد: نعم؟؟؟؟؟؟؟؟؟؟؟؟ وايش رديت عليه؟
سالم: مشيت عنه
خالد:هذا مايعرف له غير سامي .. اذا كلمك قوله سامي بيرد عليك.. وصدقني بيخاف
مادري كيف ابتسمنا انا وهو.. والله غصب عنا
*************************
الأحد يونيو 29, 2008 2:54 pm
